1. СУНАХААС СЭРГИЙЛЭЭРЭЙ

Ноос, ноолууран хувцасаа олон өдөр дарааллан өмсөхөөс зайлс хийгээрэй. Хэд хоног дарааллан өмссөн бол 2-3 өдөр амрааж хэвших нь таны ноосон эдлэлийн эдэлгээг уртасгах болно.

2. ГОГДОХ ЗҮЙЛЭЭС ХОЛ БАЙЛГААРАЙ 

Метал зүүлт, бугуйвч, бүс, гинжин оосортой цүнх, тэр ч бүү хэл матрын арьсан цүнх хүртэл таны сүлжмэл эдлэлийг гогдон хөвөх аюултай байдгийг битгий мартаарай.Сувдан зүүлт, торгон алчуур, арьсан оосортой цаг зэрэг аксессуарыг ноос, ноолууран эдлэлтэй хослуулахад хамгийн тохиромжтой. 

3. БОЛГООМЖТОЙ УГААЖ ХЭВШЭЭРЭЙ

Хүйтэн бүлээн усанд шингэн савангаа хийж хөөсрүүлэн дараа нь сүлжмэл эдлэлээ хийн гараар угааж болно. Хэрвээ танд зориулалтын угаагч шингэн саван байхгүй бол сайн чанарын шампуниар орлуулж болно. Учир нь ноос, ноолуур нь малын үс учраас шампуниар угаахад болохгүй зүйлгүй. Мөн өөр өнгөтэй сүлжмэл эдлэлүүдээ тус тусад нь угааж хэвших хэрэгтэй бөгөөд цайруулагч хэзээ ч ашиглаж болохгүйг бүү мартаарай.

4. УГААЛГЫН ТОР АШИГЛААРАЙ

Сүлжмэл эдлэлийг зөвхөн гараар угаах заалттай байсан бол сүүлийн үеийн угаалгын машинууд ноос, ноолууран эдлэлийн горимтой болсон билээ. Тиймээс мэдээж угаалгын машинд угааж болох ч ингэхдээ ноос, ноолууран хувцсаа угаалгын торонд хийхийг зөвлөж байна. Гэхдээ цэвэр ноолууран хувцсыг болж өгвөл гараар угааж байх нь эдэлгээг уртасгаж өгдөг болохыг мартуузай. 

5. ХЭРХЭН ЗӨВ ХАТААХ ВЭ? 

Угаасны дараа мушгиж огт болохгүйг хамгийн түрүүнд анхааруулъя! Оронд нь илүүдэл усыг зөөлөн базалж шавхаж авсны дараа хатаагч дээр алчуур дэвсээд хэлбэрээр нь дэлгэж тавина. Ингэхдээ сэгсэрч болохгүй бөгөөд нарны шууд тусгал болон халуун үлээгчээс зайдуу дэлгэхийг анхаарна уу.

6. ИНДҮҮДЭХ БОЛ…

Ноос, ноолууран эдлэлд уурын индүү хамгийн тохиромжтой бөгөөд хамгийн дээд талдаа 40 хэм хүртэл халаах боломжтой. Хэрэв танд уурын индүү байхгүй бол хувцсаа бага зэрэг чийгтэй байхад нь чийгтэй алчуур тавьж бүлээн индүүгээр индүүдэж болно.

7. ХЭЗЭЭ ХИМИ ЦЭВЭРЛЭГЭЭНД ӨГӨХ ВЭ?

Хуурай хими цэвэрлэгээг гараар угаагаад арилдаггүй толбо тогтсон үед ашиглах нь зөв сонголт болно. Таны сүлжмэл эдлэл савхин товчтой эсхүл сүлжмэлийн хээ нь онцгой загвартай үед хуурай хими цэвэрлэгээ илүү тохиромжтой байдаг. 

8. БӨӨГНӨРСНИЙГ ХЭРХЭН ЦЭВЭРЛЭХ ВЭ? 

Сүлжмэл эдлэлд тань хэргэлээний явцад үрэлтийн улмаас жижиг шааргин бөмбөлгүүд бий болох нь таны сүлжмэл эдлэл чанар муутай гэсэн үг биш, харин ч эсрэгээрээ цэвэр малын гаралтай гэдгийн баталгаа юм. 

Үрэлтээс үүссэн эдгээр бөмбөлгийг самнаж авахыг санал болгож байна. Алгуурхан хөдөлгөөнөөр шааргилсан бөмблөгүүдийг нэг чигт самнаж цэвэрлэх ба эхний самналтын дараа зааврын дагуу угааж арчилсанаар 2-3 цэвэрлэгээ болон угаалтын дараа бүр мөсөн арилах болно. 

9. ӨЛГӨХГҮЙ, ЭВХЭНЭ

Сүлжмэл ноосон эдлэлийн улирал дуусаж хайртай хувцаснуудаа далд хийхээр шийдсэн бол чийг багатай, нарны шууд тусгалгүй газарт хадгалаарай. Сүлжмэл хувцсаа өлгөж биш эвхэж нь хадгалах нь хэлбэрээ алдахгүй байхад чухал нөлөөтэй. Эвхсэн хувцсаа нимгэн цаасанд ороож эсвэл даавуун уутанд хийж хадгалах нь тохиромжтой юм.

10. ЭРВЭЭХЭЙНЭЭС ХАМГААЛАХ ДҮРЭМ

Хувцсыг шавж хорхойноос хамгаалахах төрөл бүрийн бүтээгдэхүүнүүд бий. Гэхдээ хортон шавжнаас хувцсаа хамгаалах хамгийн энгийн арга бол хураахаасаа өмнө залхууралгүй бүгдийг нь угааж цэвэрлэх юм.

“Нэг л өмссөн юм чинь гайгүй дээ” гэж та бодож магадгүй. Гэхдээ таны биеэс ялгарах тос, үнэртэй ус, элдэв бүтээгдэхүүний үлдэгдэл зэрэг нь эрвээхэйний хувьд төгс хоол болдог. Тэгэхээр хувцсаа угааж, цэвэрлэхгүй далд хийх нь тэдэнд хоолыг нь бэлдэж өгч байгаагаас ялгаагүй гэдгийг бүү мартаарай.

Хайртай хувцас тань таныг үргэлж дулаан байлгаж, он удаан жилийг хамт үдэх болтугай!

The post Ноос, Ноолуурыг Арчлах 10 Зөвлөмж appeared first on Avant.

Soapnut буюу савангийн ургамал нь Энэтхэг, Непал зэрэг халуун оронд ургадаг нэгэн төрлийн жимс юм. Гаднах хатуу хальсыг нь хатаагаад усанд хийхээр хөөсрөх бөгөөд хувцас, бие, үс гээд бүх төрлийн угаалгын бодисыг орлуулж болдог. Өчнөөн олон төрлийн угаалгын бодис байсаар байхад яагаад савангийн ургамлыг сонгох нь зөв вэ гэж үү?

Эрүүл мэндэд хоргүй

Хүн бүр л ямар нэг харшилтай болсон энэ үед бид хоол хүнс, хувцас, ариун цэврийн хэрэгслээ сонгохдоо элдэв химийн хортой бодис ороогүй, байгалийн гаралтай байлгахыг хичээдэг болжээ. Ялангуяа экзем, псориазтай хүмүүс, эмзэг арьстай хүүхдүүдэд хамгийн тохиромжтой сонголт нь савангийн ургамал болж буй. Химийн хүчтэй найрлага ороогүй байгалийн гаралтай тул мэдрэмтгий арьсыг цочроож, эмзэглүүлдэггүй давуу талтай. 

Олон янзаар ашиглах боломжтой 

Дээр дурдсанчлан савангийн ургамлыг зөвхөн хувцас гэхгүй аяга үс, биеэ угааж, ойр зуурын цэвэрлэгээнд ашиглаж болно. Савангийн ургамлаа усанд буцалгаж, шүүгээд бэлэн болсон уусмалаа шампунь, саван шиг хэрэглэнэ. Үсээ угаахдаа хуйхаа массажлаад 5 минутын дараа зайлна. Бидний хэрэглэдэг саван, шампунь шиг хөөсрөхгүй ч бохирдлыг цэвэрлэх үндсэн үүргээ төвөггүй биелүүлнэ. Энэ уусмалаа гэрийн тэжээвэр амьтны саван, жимс ногоо угаагч, бүх төрлийн цэвэрлэгээнд ашиглах боломжтой. 

Хэмнэлттэй

Нэг удаагийн угаалганд 4-6 ширхэг бөндгөрийг ашиглах бөгөөд наранд хатаагаад дахиад нэлээн хэд ашиглах боломжтой. Угаалгын бодис дунджаар 30’000-50’000₮ үнэтэй байдаг бөгөөд мэдээж нэгийг аваад зогсохгүй хар, цагаан, өнгөт, ноос ноолуурын, зайлагч гээд төрөл бүрээс нь авах хэрэг гардаг шүү дээ. Харин савангийн ургамлаар бүх төрлийн хувцсыг угаах боломжтой бөгөөд байгалийн гаралтай тул хувцсанд тань ч гамтай, зөөлрүүлэгч хэрэглэх шаардлагагүй. 

Байгальд ээлтэй

Савангийн ургамлыг сонгох хамгийн гол шалтгаан нь гэхэд хилсдэхгүй биз ээ. Бидний хэрэглэдэг угаалгын бодисууд усны нөөцийг бохирдуулж байдаг. Угаалгын бодис ихэнхдээ гялгар уут эсвэл хуванцар савлагаатай байдгаас гадна нунтаг, шингэн гээд аль аль нь микропластик агуулдгийг судалгаагаар баталжээ. Харин савангийн ургамал бол бусад ургамлын адилаар байгальдаа шингээд л алга болчихно.

Хэрэглэхэд амар 

Савангийн ургамлыг норгоход хальсанд /яс/ нь агуулагдах сапонин хэмээх бодис ялгарч хөөсөрдөг бөгөөд энэ нь 100% байгалийн гаралтай юм. Тиймээс хувцсаа угаахдаа зориулалтын даавуун торонд нь 4-5 ширхэгийг хийгээд хувцастайгаа хамт угаалгын машиндаа хийчихэд л болно. Гарахаар нь хатаагаад дахин ашиглаж болдог. Зөөлрөөд, саарал болоод ирэхээр нь бордоо болгоод ашиглачихаж болно. Хамгийн гол нь сапонин бүлээн усанд идэвхждэг гэдгийг мартуузай. Тиймээс хүйтэн усаар хувцсаа угаах бол савангийн ургамлаа урьдчилан халуун усанд дэвтээж хэрэглээрэй.

The post Угаалгын бодисоо савангийн ургамлаар солих 5 шалтгаан appeared first on Avant.

Зураг дээр 2 өөр улаан өнгө байгаа бөгөөд хоёулаа ижил масс өнгөтэй, гэхдээ өөр туяатай байна. Дээд талын улаан өнгө нь улбар шар өнгөтэй, нөгөө нь нил ягаан өнгөтэй мэт харагдаж байна. 1-р өнгө дулаан 2-р өнгө хүйтэн гэж тодорхойлдог. Тэгвэл яаж хуваарилаад байгааг доорх зургаас харна уу.

Хувцаслалт, нүүр будалт, үсний өнгөний хувьд таны сонгож болох хамгийн зөв өнгө нь таныхтай ижил туяатай өнгө юм. Хэрэв таны арьс дулаахан туяатай бол та нүүрээ дулаан өнгөөр ​​будаж, хувцас сонгохдоо эсрэгээр нь өмсвөл илүү сайхан харагдах болно.

NEUTRAL UNDERTONE ямар өнгийн хувцас сонгох вэ?

Хэрэв таны өнгө нь төвийг сахисан бол та дулаан, хүйтэн туяатай аль ч хувцас танд зохино. Азтай юмаа!

Төвийг сахисан туяа: Хар, цагаан, саарал, шаргал, хар хөх зэрэг төвийг сахисан өнгөнүүд нь бүгдтэй зохицдог бөгөөд төвийг сахисан туяатай сайн тохирдог. Эдгээр өнгө нь хувцаслалтын суурь болж өгдөг. Таныг сайхан харагдуулах өнгийг дурдвал:

Байгалийн өнгө: Чидун ногоон, шаргал, тэмээн бор зэрэг шороон туяа нь таны төвийг сахисан өнгөтэй арьсанд дулаан уур амьсгал нэмнэ. Эдгээр өнгийг хувцсыг өмссөнөөр натурал бөгөөд тэнцвэртэй харагдана.

Таны чулуу: Маргад эрдэнийн ногоон, индранил цэнхэр, ягаан, бадмаараг улаан гэх мэт үнэт эрдэнийн өнгө нь төвийг сахисан туяатай арьсанд тохирсон байдаг. Ийм баялаг өнгөнүүд таны хувцаслалтад эрч хүч нэмэх болно.

Пастел: Зөөлөн ягаан, гааны ногоон, нярайн цэнхэр зэрэг зөөлөн өнгөнүүд таны саармаг өнгө аясыг нөхөж, дүр төрхийг тань эмзэг, эмэгтэйлэг харагдуулна.

Аксессуар: Төвийг сахисан туяатай хүнд дулаан, хүйтэн гээд аль аль металл зохидог. Танд алт, мөнгө, сарнайн өнгөтэй алт, хүрэл зэрэг бүх төрлийн гоёл чимэглэл зохих тул хувцаслалтаа гялалзсан, боловсронгуй болгоход хүссэн аксессуараа сонгох боломжтой.

COOL UNDERTONE ямар өнгийн хувцас сонгох вэ?

Хэрэв таны арьс хүйтэн туяатай бол таны өнгө төрхийг тодотгох олон төрлийн өнгө танд бий.

Өнгө: Цэнхэр, нил ягаан, ягаан, ногоон гэх мэт хүйтэн өнгө аястай өнгийг сонгоорой. Улбар шар, шар, хүрэн гэх мэт дулаан өнгөнүүд таны арьсанд тохирохгүй тул зайлсхийхийг зөвлөе .

Төвийг сахисан өнгө: Хүйтэн өнгийг төвийг сахисан өнгөтэй зохицуулах боломжтой. Шаргал, тэмээн бор гэх мэт дулаан өнгөний оронд саарал, хар хөх, нүүрс зэрэг саармаг өнгөний сэрүүн хувилбаруудыг сонго.

Үнэт эдлэл: Мөнгө эсвэл цагаан алтан үнэт эдлэл нь хүйтэн өнгө аясыг тодруулж өгдөг. Эдгээр нь таны арьсны хүйтэн туяаг тодотгож, тун аятайхан харагдуулах болно. Таны өнгө аястай зөрчилдөх талтай тул алтан гоёл чимэглэлээс зайлсхий.

Хувцаслалт: Мөсөн хөх, зөөлөн саарал, эсвэл хүйтэн өнгөт пастел гэх мэт сэрүүн өнгийг сонгоорой. Эдгээр өнгө нь таны өнгө аясыг тодруулж, шинэлэг, сэрүүн уур амьсгалыг өгөх болно.

Нүүр будалт: Нүүр будалтын тухайд сэрүүн өнгөтэй сүүдэр сонгох хэрэгтэй. Суурь болон өө дарагчийн хувьд ягаан эсвэл төвийг сахисан туяатай бүтээгдэхүүнийг сонгоорой. Нүдний будаг, уруулын будгийн тухайд цэнхэр, нил ягаан, ягаан, жимсгэнийн өнгө зэргийг сонгоорой.

WARM UNDERTONE ямар өнгийн хувцас сонгох вэ?

Хэрэв таны арьс дулаан туяатай бол тохирох хувцасны өнгийг сонгосноор байгалийн өнгө төрхөө тодруулж, улам өнгөлөг харагдах боломжтой.

Шороон өнгө: Бор, тэмээн бор, чидун ногоон, гичийн шар, шатсан улбар шар зэрэг дулаан, шороон өнгийг сонгоорой. Эдгээр өнгө нь таны арьсны өнгөний дулааныг илтгэнэ.

Дулаан саармаг: Шаргал, цөцгийн гэх мэт дулаан саармаг өнгө сонгох хэрэгтэй. Эдгээр өнгөнүүд нь таны арьсны өнгийг тодотгох зөөлөн дэвсгэр болж өгнө.

Үнэт чулуу: Хүрэн улаан, маргад ногоон, дулаан нил ягаан зэрэг дулаан өнгө бүхий гүн үнэт эрдэнийг сонгоорой. Эдгээр өнгө нь таны ерөнхий дүр төрхийг эрч хүчтэй харагдуулахад тусалдаг.

Аксессуар: Алт, сарнай алт зэрэг дулаан металлыг сонгоорой. Эдгээр өнгөнүүд нь хүйтэн өнгөт мөнгөнөөс илүү дулаан өнгө аястай байдаг.

Хээ хуар: Дулаан өнгө эсвэл шороон өнгө агуулсан хээ, дүрс танд зохино. Жишээ нь, дулаан өнгөт цэцэг эсвэл дулаан өнгөт дэвсгэртэй амьтны хээ, зурагтай хувцас, хэрэглэл нь маш сайн сонголт байх болно.

Сэрүүн өнгөнөөс зайлсхий: Мөсөн цэнхэр, хүйтэн саарал, мөнгөлөг зэрэг хүйтэн өнгөнөөс зайлсхийхийг хичээ. Эдгээр өнгө нь дулаан туяа бүхий арьстай хүнд таатай биш деталийг нь тодотгодог талтай.

Эцэст нь хэлэхэд дээрх зөвлөгөө нь өнгөний ерөнхий дүрэм бөгөөд хүн бүрийн хувьд харилцан адилгүй тул тухайн хүний онцлогийг тооцсоноор илүү оновчтой болно. Яг өөрт тохирсон өнгө, туяаг мэдэхэд тань өнгөний мэргэжилтэн туслах бөгөөд тэр хүртэл та олон янзын өнгийг туршиж, таны арьсны өнгөнд хэрхэн нийцэж байгааг ажиглаж, өөрт тохирох хослолыг олоорой.

The post Надад ямар өнгө тохирох вэ? appeared first on Avant.

Тогтвортой, байгальд ээлтэй хувцасны сонголтуудын эрэлт нэмэгдэж байгаа нь хулсан хөвөнгийн үйлдвэрлэлийг хөгжүүлэхэд хүргэж байгаа билээ. Энэхүү өсөлт нь Хятад, Энэтхэг, Вьетнам зэрэг хулс мод тарьж, даавуу үйлдвэрлэдэг орнуудын тариаланчид, үйлдвэрлэгчдэд эдийн засгийн боломж томоохон боломж олгож байна.

Хулсан нэхмэлийн дэлхийн зах зээлийн хэмжээ 2020 онд 10.9 тэрбум ам.доллараар үнэлэгдсэн бөгөөд 2027 он гэхэд 25.2 тэрбум ам.долларт хүрч, урьдчилсан хугацаанд CAGR 12.9 хувиар өсөх төлөвтэй байна. Бид ч гэсэн Дэлхийн чиг хандлагыг даган хулсан даавуугаар хийсэн утсыг сонгон ашигдаж байна.

Бид энэ удаагын нийтлэлээрээ хулснаас гаргаж авсан даавуун хувцасны тухай 10 сонирхолтой баримт хүргэж байна.

1. Хулсан хөвөн даавуу нь хулс болон хөвөнгийн утаснуудын холимогоор хийгдсэн даавууны төрөл юм.
2. Хулсан хөвөн даавуу нь зөөлөн, хөнгөн, амьсгалдаг гэдгээрээ алдартай.
3. Хулсыг боловсруулахад хөвөнгөөс бага ус, пестицид бага шаарддаг бөгөөд хурдацтай хөгжиж буй, нөхөн сэргээгдэх нөөц юм.

4.Хулсан ширхэгүүд нь байгалийн нян, мөөгөнцөр, статикийн эсрэг үйлчилгээтэй тул хулсны хөвөн даавуу нь байгалийн гаралтай үнэр, хөгц, бактерид тэсвэртэй юм.

5. Хулсан хөвөн даавуу нь чийг шингээх шинж чанартай тул өмссөн хүнийг сэрүүн, хуурай байлгахад тусалдаг.

6. Хулсан даавуун хувцас нь харшил үүсгэдэггүй, арьсанд зөөлөн байдаг тул эмзэг арьстай хүмүүст тохиромжтой.

7. Хулсан даавуун хувцасыг арчлахад хялбар бөгөөд машинд угааж, хатааж болно.

8. Хулсан даавуун хувцас нь удаан эдэлгээтэй тул хувцасны шүүгээнд маш сайн хөрөнгө оруулалт болно.

9. Хулсан хөвөн нь подволк, даашинз, леггинс гэх мэт олон төрлийн хувцас үйлдвэрлэхэд ашиглаж болдог.

10. Хулсан даавуун хувцас нь өндөр чанартай хувцас бөгөөд удаан эдэлгээтэй байхын зэрэгцээ байгаль орчинд үзүүлэх сөрөг нөлөөллийг бууруулахыг хүсдэг хэрэглэгчдийн хувьд тогтвортой, байгальд ээлтэй сонголт юм.

The post Хулсан даавуун хувцасны тухай 10 баримт appeared first on Avant.

2022 оны онцлох зүйлүүдээсээ хуваалцаач?

Өнгөрсөн жил бид нар Зулаа найзтайгаа хамтраад Happy Zet Clinic гэдэг нэртэй хүүхэд, өсвөр үеийнхэний цогц клиник нээсэн байгаа. Бидний хамгийн гол зорилгуудын маань нэг бол бидний хойш ирээдүй болсон хүүхдүүдийн маань эрүүл мэндэд сөргөөр нөлөөлөөд байгаа эрсдэлүүдийг бууруулах, эерэгээр нөлөөлөх хамгаалах хүчин зүйлсийг нэмэгдүүлэхэд чиглэж, илүү эрүүл насанд хүрэгч болоход нь туслах билээ.

Үүнтэй холбоотой хүүхэд, өсвөр үе болон залуусын хорт зуршлын чиглэлээр судалгааны ажил хийж эхэлсэн мөн сонирхолтой бөгөөд томоохон судалгааны ажилд нэгдэж орсон байгаа. Энэ нь хүүхдийн цусан дах хорт металлын судалгаа юм.

Хүүхдийн цусан дах хорт металлын судалгаа гэж сонсож байгаагүй юм байнаа, энэ талаар дэлгэрүүлвэл? 

Дэлхийн хөгжилтэй орнуудын туршилгаар хүүхдийн цусны биомониторингийн шинжилгээ ялангуяа бага насны хүүхдэд өсөлт, хөгжил эрчимтэй явагдаж байх үед нь хийгддэг. Ингэснээр хүний эрүүл мэндэд хортой нөлөөтэй аливаа бодисын өртөлтийг эрт хугацаанд илрүүлэх, таслан зогсоох, цаашдын архаг хордолт, хүндрэлээс сэргийлэх зэрэг олон талын ач холбогдолтой байдаг юм байна.

Орчин болон хөдөлмөрийн эрүүл мэндийн чиглэлээр мэргэжлийн үйл ажиллагаа явуулдаг Health solutions байгууллага, орчны эрүүл мэнд, хор судлалын лабораторын эрхлэгч Д.Нарансүх доктор санаачлан тэдний байгууллага дээр бага насны хүүхдийн цусан дахь хорт металлын судалгаа эхлээд явж байгаа. Цаашдаа энэ судалгаа бусад хөгжилтэй орны туршилгаар хүүхдийн цусны биомониторинг болон өргөжих алсын хараатай, судалгаа юм байна лээ. 

Агаарын бохирдол зөвхөн УБ хотын асуудал биш, хөдөө орон нутгийн суурин газруудад орчны эрүүл мэндийн маш том асуудал болоод байгаа. Монгол хүүхдүүд, ялангуяа хот суурин газар амьдарч байгаа хүүхдүүдийн хувьд агаарын бохирдолд өртөлт нь эрүүл мэндийн тэгш бус байдлыг бий болгож, эрүүл, аюулгүй орчинд амьдрах гэсэн хүний суурь эрх ноцтойгоор зөрчигдөх болоод нилээд хугацаа өнгөрчээ.

Агаарын бохирдол нь бидэнд анзаарагдаж байгаа амьсгалын замын өвчлөлийг үүсгэхээс гадна бидний огт анзаараагүй хорт металлын хордлого үүсгэх эрсдэлтэй юм байна. Бидний хийж буй энэ  судалгаа нь бага насны хүүхдийн цусан дахь хорт металлын өртөлтийг гадна болон доторх агаарын бохирдолтой уялдуулан судлах зорилготой. Би энэ судалгааны багт сургуулиа, эмнэлгээ төлөөлөөд судлаачаар оролцох завшаан тохиолдсон. Хувь хүний хувьд ч тэр, эмнэлгийн маань зорилго чиглэлтэй ч тэр нийцэж байгаа болохоор энэ багт ажиллаж байгаадаа баяртай байгаа.

Хүүхдийн цусан дах хорт металлыг хэмжихдээ ямар арга техникээр хэмждэг вэ?

Манай эцэг эхчүүд хүүхдийн цусан дахь хорт металлын хордлогын шинжилгээг хийлгэхийн тулд гадаад явдаг эсхүл хүүхдийнхээ үс эсвэл цусыг гадаадруу явуулж шинжлүүлдэг байсан. Харин орчны эрүүл мэнд, хор судлалын лаборатори цусан дахь хорт металл болон микро элементийг илрүүлж, судлах өндөр хүчин чадалтай лабораторийг Монголд оруулж ирэн ажиллуулж байгаа.

Энэ нь хар туглага, цагаан туглага, берилли хөнгөн цагаан, никель гэх мэт 14 төрлийн хортой металлыг нарийвчилсан шинжилгээгээр тодорхойлно гэсэн үг. Энэ хорт металлуудаар хүүхдүүд бага наснаас эхлэн удаан хугацаанд хордвол сэтгэн бодох чадвар, ой тогтоолт, оюуны хөгжил, IQ-д муугаар нөлөөлдөг байна.

Хорт металл хаанаас яаж үүсээд байна вэ? Урьдчилан сэргийдэх эсхүл эмчилгээ байдаг уу?

Архаг хэлбэрийн хордлогоос сэргийлэх, цусан дахь хордлогийг тайлах, эх сурвалжийг олж тогтоох, арилгах боломжтой. Энэ шинжилгээ мөн манай эмнэлгээр дамжин олон нийтэд нээлттэй хийгдэж байгаа. Зөвлөгөө, мэдээлэл авах, өртөлтийг тодорхойлуулах бүрэн боломжтой шүү.

Миний хувьд энэ судалгааны ажилд хүүхдүүд маань хорт металлын хордлогод өртөөд байгаа юм биш биздээ гэсэн томоохон асуултанд хариу өгч байгаа учир энэ судалгаанд орж ажиллаж байна.  

Авантын хэрэглэгчийн хувьд таны сэтгэгдэл? 

Авантад дуртай. Өвөл зунгүй өмсдөг. Одоо ч өмссөн байнаа. Концепц буюу ерөнхий агууллага нь таалагддаг.  Загварын болон арт мэдрэмж маш сайтай найз маань хийдэг. 

The post М.Ундрам: Агаарын бохирдлоос үүдэлтэй үүссэн цусан дахь хорт металл бидний анхаарах сэдэв. appeared first on Avant.

Энэ асуултын хариу харамсалтай нь энгийн биш. Учир нь энэ олон брэнд бүгд өөр өөр улсаас гаралтай бөгөөд үүнийгээ дагаад тухайн улс үндэстний бие физиологийн онцлогт тохирсон хэмжээтэй байх нь түгээмэл. Тиймээс брэнд бүр өөрийн гэсэн хэмжээний хүснэгттэй байдаг гэхэд хилсдэхгүй. 

Авантын хувьд анхнаасаа монгол хүний биеийн онцлогт нийцүүлж бүтээсэн тул дээрх асуултад хариулахад харьцангуй амар. Үйлчлүүлэгчдээс маань ирдэг хамгийн түгээмэл асуулт бол “Тэдэн см өндөр, тэдэн кг жинтэй хүнд аль размер нь таарах вэ?”. Тэгвэл та бүхэнд сонголтоо хийхэд амар болгох үүднээс Авантын хэмжээний хүснэгтийг хуваалцаж байна. 

Ерөнхий размер

ХАРАНДААН ЮБКА

Хэмжээ /см/	S/M	M/L
өргөн /см/	46	48
урт /см/	68	70
онооны өндөр /см/	15.5	15.5

ДУНД ХҮРЭМ

Хэмжээ /см/	S/M	M/L
Мөрний өргөн /см/	46	48
Цээжний урт /см/	68	70
Ханцуйн урт /см/	62	62

БОГИНО ХҮРЭМ

Хэмжээ /см/	S/M	M/L
Мөрний өргөн /см/	37	41
Цээжний урт /см/	50	52
Ханцуйн урт /см/	58	60

БОГИНО ЖАКАРТ КАРДИГАН

Хэмжээ /см/	S/M	M/L
Мөрний өргөн /см/	37	38
Цээжний урт /см/	59	61
Ханцуйн урт /см/	59	60

ЖАКАРТАН КАРДИГАН

Хэмжээ /см/	Free size
Мөрний өргөн /см/	68
Цээжний урт /см/	72
Ханцуйн урт /см/	21
Хүзүүнээс гарын бугуй хүртлэх урт	57

Хэдийгээр Авантын загварууд S/M, M/L гэсэн үндсэн хоёр л размертай ч хэрэв танд илүү жижиг эсвэл илүү том размер хэрэгтэй бол хэмжээгээ өгөөд захиалгаар хийлгэх боломжтой шүү.  

Best selling Products

The post Ямар размер танд таарахыг яаж мэдэх вэ? appeared first on Avant.

– Арьсанд сайн гэж хүмүүсийн ярьдаг түгээмэл буруу ойлголт юу вэ?

– Хамгийн түгээмэл нь лимоноор арьсаа арчих. Лимонд агуулагддаг С витамин арьсанд сайн хэдий ч хоол боловсруулах замаар дамжиж үйлчлэхдээ л зөв нөлөөг үзүүлнэ. Харин лимоны хальс, шүүсээр шууд арчих нь арсыг хэт цочроож, гэмтээдэг. Турмерикийг тохирсон хэмжээгээр, зөв найруулж хэрэглэхэд тустай ч дангаар нь зуурж түрхвэл мөн л хурцаддаг. 

Үүнээс гадна батгашдаг арьсыг их угааж, спиртээр арчиж хатаавал тослотож, батга гарахгүй гэсэн ойлголт маш буруу. Учир нь арьс хуурайших тусамаа улам их тос ялгаруулж эхэлдэг. Тиймээс чийгшүүлж байх нь чухал. Арьс усаа хэт их алдаагүй, чийгшил сайтай байхдаа тосны ялгарлыг тэнцвэржүүлж байдаг. 

– Гоё арьстай байхад нөлөөлдөг хамгийн чухал 3 зүйл юу вэ? 

– Хамгийн түрүүнд амьдралын хэв маяг буюу нойр, хооллолт, гэрийн арьс арчилгаа. Арьсанд хэрэгтэй уургаа авч байгаа эсэх гээд идэж, уух зүйлийнхээ найрлагыг үргэлж бодож байх нь чухал. Арьсыг чанга, залуу харагдуулдаг гол зүйл бол коллаген буюу арьсны уураг. Зөв уурагтай хоол хүнс хэрэглэснээр арьсны эсүүд коллагенаа үйлдвэрлэж, арьс илүү чанга, булбарай болдог. Мөн ус их ууснаар арьс шууд чийгшил авдаггүй бөгөөд тохируулж ууснаар бодисын солилцоо тэнцвэртэй явагддаг ба энэ цаашлаад арьсанд сайнаар нөлөөлдөг.  

Үүн дээр нэмээд орхигдуулж болохгүй зүйл бол арьс арчилгаа. Хүн бүрийн арьс өөрийн гэсэн онцлогтой тул өөрт тохирсон бүтээгдэхүүнээ л сонгох хэрэгтэй. Харин арьс арчилгааны үндсэн 3 үе шат бүх хүний хувьд адилхан. Энэ тогтмол цэвэрлэх, чийгшүүлэх мөн нарнаас хамгаалах юм. 

– Зөвхөн гэрийн нөхцөлд хийж буй арьс арчилгаа арьсыг сайхан байлгахад хангалттай байж чадах уу? Нэмэлт арчилгаа заавал шаардлагатай юу?

– Мэргэжлийн арьс арчилгааг зайлшгүй шаардлагатай гэхгүй ч арьсны онцлог болон насны онцлогоос хамаараад байх ёстой. Хэдий нас залуу байвч сэвх, нөсөө, батгашил зэрэг арьсны ямар нэг асуудалтай бол мэргэжлийн эмчид хандаж зөвлөгөө авч, эмчилгээ хийлгэх хэрэгтэй. 

Харин 30-аас дээш насныхан өөртөө тохирсон хөгшрөлтийн эсрэг мэргэжлийн эмчилгээг сонгож хийж эхлэх нь зөв бөгөөд ингэснээр арьсныхаа залуу байдлыг хадгалж үлдэх нөхцөл бүрддэг. Хамгийн багадаа сард 1-2 удаа гоо сайханд орсноор арьсны цусан хангамж сайжирч, нөхөн төлжилт нь эрчимждэг. 

Сүүлийн үед хөгшрөлтийн эсрэг аппаратын болон тарилга эмчилгээнүүд маш олон болсон тул мэргэжлийн эмчээс зөвлөгөө авч өөрт тохирохыг сонгож хийлгэх нь зөв. 

– Нэг бүтээгдэхүүнийг удаан хэрэглэхээр нөлөөлөхөө больсон юм шиг санагддаг. Энэ нь хааяа сольж байх хэрэгтэй гэсэн үг үү?

– Энэ асуудалтай бараг бүх эмэгтэйчүүд тулгарч байсан байх. Энэ нь юун түрүүнд хүн анзаарахаа больдогтой холбоотой. Бүтээгдэхүүн үзүүлж байсан үйлчилгээгээ үзүүлж л байгаа ч хэдэн сарын дараа хүмүүс үүнд нь дасаад өөрчлөгдөхгүй байгаа юм шиг санагдаж эхэлдэг. 

Хоёрдугаарт энэ нь улиралтай холбоотой байдаг. Ялангуяа жилийн 4 улиралтай Монголын нөхцөлд хэт халах эсвэл хүйтрэх, хэт хуурайшилттай холбоотойгоор таны хэрэглэдэг бүтээгдэхүүн хангалтгүй болж эхэлдэг. Зун хэрэглэж эхэлсэн бүтээгдэхүүн сайн үр нөлөөтэй байсан ч өвөл хангалттай үр дүн өгч чаддаггүй. Энэ үед нэмэлтээр маск, серум зэрэг тэжээл, чийгшлийг нэмэгдүүлэх хэрэгтэй. 

Үүнээс гадна эмэгтэйчүүдийн гормоны өөрчлөлттэй холбоотой байх боломжтой. Жишээ нь, сарын тэмдгийн мөчлөгөөр зарим хүний арьс хэт тослогждог. Үүний улмаас хэрэглэж дадсан бүтээгдэхүүн тань нөлөөлөхгүй байх магадлалтай. Тиймээс энэ бүх хүчин зүйлийг харгалзан арьс арчилгаагаа тухайн цаг үе бүрд нь тохируулж байх хэрэгтэй.

Мөн бүтээгдэхүүнийг буруу хадгалсан эсвэл буруу хэрэглэсэн тохиолдолд үр дүнгээ өгдөггүй тул үүнийг бас анхаарч байгаарай. 

– Арьс арчилгаа ихэднэ гэж байдаг уу?

– Арьс арчилгаа ихэднэ гэж байхгүй. Арьсныхаа онцлогт тохирсон хэчнээн ч үе шаттай арчилгаа байж болно. Хамгийн гол нь хэрэглэж буй бүтээгдэхүүнүүд тань найрлагын хувьд харшилахгүй байх хэрэгтэй. Хоорондоо зохицдоггүй бүтээгдэхүүнүүдийг хамтад нь хэрэглэснээр үр дүн өгч, нөлөө нь мэдэгдэхгүй байх эсвэл арьсаа гэмтээх тохиолдол ч бий. 

– Яагаад Авант гэж? 

– Авантыг хувцасыг өмсөхөд эвтэйхэн, дулаахан байдаг. Загварууд нь энгийн мөртлөө хөөрхөн деталиудтай байдаг нь их таалагддаг. Жишээ нь миний өмсөх дуртай энэ өдтэй цамцны загварт би их дуртай.  

Best selling Products

The post Б.Рэнцэнханд: Удаан хэрэглэсэн бүтээгдэхүүн арьсанд нөлөөлөхөө больсон мэт санагдах нь хэд хэдэн шалтгаантай appeared first on Avant.

Холистик хандлага гэж юу вэ? Холистик эрүүл мэндийн зөвлөх яг юу хийдэг вэ?

Холистик хандлага нь аливааг нэг өнцгөөс бус цогц байдлаар харж түүнд агуулагдаж буй бүхнийг жижиглэн ангилж тус бүрээр нь авч үзэхийг хэлнэ. Харин холистик эрүүл мэндийн зөвлөх нь хүмүүст тэнцвэртэй амьдрах арга ухаанд суралцахад нь тусалдаг. 

Ингэхдээ тухайн хүний нийгмийн байдал, санхүү, гэр бүлийн харилцаа болон гэрийн орчин дахь уур амьсгал, хоололт, сэтгэл зүйн байдал, карьер болон ажлын нөхцөл байдал зэрэг мэдээлэл чухал. Яагаад үүнийг мэдэх шаардлагатай вэ гэхээр бид өдөр тутамдаа амьдралыг бүрдүүлэгч эдгээр хэсгээс сайн муу мэдээллийг байнга авч байдаг. Энэ нь цаашлаад бидэнд төрөл бүрийн мэдрэмжийг төрүүлдэг. Аль нэг хэсэгт сэтгэл дундуур, урам зориггүй, эрч хүчгүй мэдрэмж байнга төрдөг бол энэ нь тухайн хүний сэтгэл зүй, бие организмд сөргөөр нөлөөлдөг. Тэгэхээр дээрх хүчин зүйлсийн аль нь таныг тавгүйцүүлж, бие организмд тань яаж нөлөөлөөд байгааг л таньж мэдэх нь чухал.

Холистик эрүүл мэндийн зөвлөх бол хоол зүйч, клиник шим тэжээл судлаач, эмч эсвэл сэтгэл зүйч биш. Харин тэнцвэртэй амьдрах арга зүй, эрүүл зохистой хооллох зэрэг зөв дадал зуршлыг төлөвшүүлэхэд нь зөвлөдөг хүмүүс юм.

Эрүүл оршихуйг цогцоор нь авч үзэх нь яагаад чухал вэ?

Бид ихэвчлэн эрүүл мэндийг зөвхөн нэг талаас нь харах гээд байдаг. Ямар нэг өвчин тусах, хэвийн бус жинтэй байх, сэтгэлийн тавгүй байдал, донтолт гээд аль нь бай суурь шалтгааныг нь таньж мэдэхийн оронд ямар нэг бүтээгдэхүүн эсвэл эмэнд найддаг. Зөвхөн шинж тэмдгийг нь дарж аль болох өвдөлт зовиургүй, өөрт тээргүй байдлаар шийдэх гэж яарна. Гэтэл эдгээр асуудлын цаана яг ямар процесс явагдаад байгааг төдийлөн ухаж ойлгодоггүй. Бид юун түрүүнд амьдралын хэв маягаа өөрчилж өвдсөн хойноо бус өвчнөөс урьдчилан сэргийлэх нь хамгийн чухал гэдгийг маш сайн ойлгох хэрэгтэй . 

Эрүүл хооллолт, хоолны дэглэм баримтлахдаа хүмүүсийн гаргадаг хамгийн түгээмэл алдаа юу вэ?

Ер нь анзаараад байхад эрүүл хооллолтыг мөнгөтэй эсвэл завтай хүмүүсийн хийдэг зүйл гэж ойлгох нь элбэг байдаг. Гэтэл яг үнэндээ бид өдөр тутамдаа идэж байгаа хүнсэндээ багахан өөрчлөлт оруулахын зэрэгцээ хөдөлгөөнөө нэмж, бодол санаагаа цэгцтэй байлгаж сурахад л болох зүйл. Уг нь маш энгийн мэт санагдах ч өөрчлөхөд их хэцүү зүйл. Хамгийн гол нь хүн өөртөө өөрчлөлт хийх гэж байгаа бол “яагаад?” мөн “үр дүн нь юу вэ?” гэдэг асуултад хариулж, түүнийгээ ухамсарласан байх нь чухал. 

Гэтэл ихэнх нь эрүүл хооллолт, хоолны дэглэмд нийгмийн хэм хэмжээ, хэн нэгэнд таалагдах гэж эсвэл бусдыг даган дуурайх маягаар түрхэн зуурын сэтгэл хөөрлөөр ханддаг учраас энэ нь урт хугацаандаа дадал болж үлддэггүй. 

Хүрээлэн буй микро орчноо эрүүл болгохын тулд юуг анхаарах вэ?

Орчноо микро түвшинд эрүүл тэнцвэртэй болгохын тулд хамгийн түрүүнд бодит зорилго тавих хэрэгтэй. Цаашлаад хэт том зорилгыг хэт богино хугацаанд тавихаас зайлсхийж, нэг цагт нэг л зүйл дээр төвлөрч сурах нь зүйтэй. Ингэснээрээ та сэтгэл зүй болон бие махбодио туйлдахаас сэргийлнэ. Ер нь хүн өөрийн болон байгалийн био хэмнэлд тааруулж ажиллаж сурах хэрэгтэй. Сүүлийн үед хүмүүс биеэ машин шиг л эдэлж элээж байгаа нь байгалийн хуулийг зөрчиж буй хэрэг. Хэрэв та өндөр ачаалалтай ажилдаг бол өөртөө таатай, тааламжтай мэдрэмж төрүүлдэг зүйлсийг заавал хийж сурах хэрэгтэй. Өөрийн хэм хэмнэлээ л таньж мэдэхийг хичээх нь хамгийн зөв.

Яагаад Авант гэж? 

Сүүлийн үед хэрхэн байгальдаа ээлтэй байж, хог бага тарьж, органик бүтээгдэхүүнийг түлхүү хэрэглэж дадах вэ гэж их бодох болсон. Харин Авантын хувьд энэ үзэлтэй минь нийцдэг бөгөөд ноолууран хувцасны нэг хэвийн уйтгартай байдлыг илүү модерн байдлаар илэрхийлэхийн зэрэгцээ өнгөний хувьд илүү залуулаг байдал нь таалагдсан.

Best selling Products

The post М.Хатансумъяа: Эрүүл оршихуй нь энгийн зүйл боловч бид л үүнийг төвөгтэй болгоод байдаг appeared first on Avant.