Хөвөн даавуу, ноос, ноолуур, торго бол байгалиас бидэнд заяасан хамгийн нандин бэлгүүдийн нэг билээ. Хувцас хэрэглэлийн түүхий эдийг эдгээр болон БУСАД (химийн аргаар гаргаж авдаг материалууд) хэмээн хуваадаг.

Дэлхийн алдартай брэндүүдийн хамгийн үнэтэй борлуулдаг бүтээгдэхүүний эгнээнд ноос, ноолууран эдлэл дээгүүр жагсдаг. Мирнусан хонины ноос дэлхий дахинд алдартай. Харин бидний бахархал болсон ноосыг тэд мэддэг болов уу? Барилгын дулаалга, эсгий тавчик зэргээр д мэддэг байх. 

Мирнусан хонины ноосны ширхэгт 17.0-21.0 микрон байдаг бол монгол хониных 18.0-22.0. Микрон буюу ноос ноолуурын ширхэгт бага байх тусмаа үнэд хүрдэг. Австрали болон монгол хонины ноос ихээхэн ялгаатай бөгөөд үүнд газар зүйн байршил, цаг агаар, маллагаа, хүнс тэжээл гэх мэт хүчин зүйл нөлөөлсөн нь тодорхой. 

Aвстраличууд мирнусан хонины ноосоо дэлхийн зах зээл дээр маш сайн таниулж чадсан. Үүний нэг жишээ бол Max Mara брэндийн Fall18/19 загварууд. Гэтэл бид чанараараа тэднээс дутахааргүй ноостой байж яагаад энэ хэмжээнд борлуулж чадахгүй байна вэ?

Тэдний ашигладаг нарийн технологиор бид монгол ноосыг сайжруулан орчин үеийн эрэлтэд нийцэх бүтээгдэхүүн хийдэг болоод нэлээд хэдэн жил өнгөрч байна. Үйлдвэрлэлийн шат дамжлагыг нуршилгүй тайлбарлавал маш олон дамжлагын үр дүнд бид хялгастай угааж самнасан ноосноос нарийн зүүтээр хамгийн нарийн ноолуурхаг ширхэгтийг ялган авч утас ээрдэг. Байгалиас заяасан гайхамшигт энэ түүхий эдийг орчин үеийн технологиор боловсруулсан дэлхийн зах зээл дээр өрсөлдөх том боломж хэмээн харж улмаар загвар болон чанартаа анхаарах нь ноос, ноолууран бүтээгдэхүүн үйлдвэрлэгч бидний үүрэг болоод буй. 

Эх дэлхийгээс бидэнд бэлэг болгон барьсан энэ түүхий эдээ ашиглан дотоодын хэрэгцээг хангаж, олон улсад гаргах уу эсвэл урдаас шуудай шуудайгаараа орж ирж буй химийн аргаар боловсруулсан хувцсаа өмссөөр л байхуу ?

#Монгол_ноосоо_моданд_оруулъя!