Бидний тухай
Бидний түүх
Эдийн засаг уналттай 2015 онд анхны бүтээгдэхүүнээ зориглон гаргаж амжилттай борлуулж дууссанаар Авант брэнд үүссэн түүхтэй.
Залуухан брэндийн арыг даадаг арвин туршлагатай мэргэжилтнүүд маань энэхүү амжилтын үндэс юм.
Авантын загваруудыг сүлжмэл хувцас үйлдвэрлэлийн салбарт 30 жил ажилласан туршлагатай мастерууд маань ур ухаанаа шингээн урладаг билээ.
Үнэт зүйл
Бүтээж буй зүйл нь гоё ганган загвар урлахаас илүү том зорилгын төлөө гэдэгт Авантын хамт олон итгэдэг. Сүлжмэл хувцас үйлдвэрлэлийн салбарт шинэ өнгө төрх нэмэх гэсэн эрмэлзлээс гадна улс орныхоо эдийн засагт хувь нэмрээ оруулах зорилго биднийг нэгтгэдэг билээ. Ингэхдээ бид чанар болоод байгальд ээлтэй үйлдвэрлэлийг эрхэмлэдэг. Түүхий эдээс авахуулаад үйлдвэрлэлийн үе шат бүрийг амьд бүхэнд ээлтэй байхад бид ихээхэн анхаардаг бөгөөд гадаад, дотоодын чанар болон тогтвортой байдлын шаардлагыг ханган ажиллаж буй.
Туршлага
Анхны бүтээгдэхүүнээ зах зээлд амжилттай гаргаснаас хойш бид Avant kids, Аvant women брэндүүдийг хөгжүүлэхийн зэрэгцээ гадаад болон дотоодын брэндүүдтэй хамтарсан төслүүдийг хэрэгжүүлээд буй.
Энэ хугацаанд бид АНУ, Шотланд, Казахстан, БНСУ зэрэг улс руу бүтээгдэхүүнээ амжилттай экспортолж, олон улсын зах зээлд танигдахын хэрээр түншийн харилцаагаа өргөжүүлсээр байна.
Бүтээгдэхүүнээ тасралтгүй сайжруулж, сэтгэл ханамжийн баталгааг хангахад хэрэглэгчдийн санал хүсэлт чухал үүрэгтэй болохыг бидний туршлага баталдаг. Тийм ч учраас үйлдвэрлэлийн шат дамжлага бүрийн ард ажиллаж буй мэргэжилтнүүдээс гадна харилцагч хувь хүмүүс болон байгууллагууд бүгд Авантыг бий болгосон юм.
Брэндийн тухай
Багаасаа загварт дуртай байсан надад хувцас үйлдвэрлэлийн салбарт хөл тавихад ээж минь чухал нөлөө үзүүлсэн. Авантыг нэхмэлийн салбарт 24 жил ажилласан туршлагатай, ноолуурын мэргэжилтэн ээжийнхээ хамтаар 2015 онд үүсгэн байгуулсан юм.
Ноолуур гэхээр л үнэтэй, арчилгаа ихтэй, амархан элэгддэг гэх хэвшмэл ойлголтыг эвдэх хүсэл анх Авантыг эхлүүлэх гол хөшүүрэг болсон. Эндээс л эдэлгээ сайн даадаг, үнийн хувьд боломжийн бөгөөд шинэлэг хэв маяг бүхий Авантын загварууд гарч эхэлсэн юм.
Санхүүч, нягтлан бодогч мэргэжилтэй намайг хувцасны загвар гаргаад сууж байна гэж хэн бодох бил ээ? Сүлжмэл хувцасны салбар луу орохоосоо өмнө би аудитын компанид ажилладаг байсан юм. Эзэмшсэн мэргэжил минь одоо надад бизнес загвараа оновчтой тодорхойлох, компанийнхаа санхүүг удирдах, түншүүдтэйгээ хэлцэл хийх зэрэг бизнесээ удирдахад ихээхэн тус болдог.
Авантыг эхэндээ зөвхөн загвартай холбож хардаг байсан ч удалгүй хийж буй зүйл минь зүгээр нэг гоё хувцас бүтээхээр хязгаарлагдахгүй гэдгийг ойлгосон юм. Үйлдвэрлэлийн явцад малын ашиг шим, эх орныхоо арвин баялгаар бахархах сэтгэл эрхгүй төрж нүүдэлчин соёл болоод монгол ноос ноолуурыг дэлхийн олон сая хүнд хүргэхийг хүсэх болсон. Загварт дурлаж эхлүүлсэн бизнес минь ийнхүү цаг хугацааны эрхээр эх орныхоо баялаг соёлыг дэлхийд түгээх томоохон зорилго болон хувирсан юм.
ТУУЛ Батбаатар /Үүсгэн байгуулагч & Бүтээлч захирал/