Сэтгэл хангалуун, илүү жаргалтай амьдрахад тань дусалхан нэмэр болохоор бид салбар бүрийн төлөөлөл болсон бүсгүйчүүд туршлагаасаа хуваалцах #AVANTLIFESTYLE цувралаа эхлүүлж байна. Анхны дугаарт маань холистик эрүүл мэндийн зөвлөх М.Хатансумъяа оролцож эрүүл амьдралын хэв маягийг цогцоор нь харахын ач холбогдлыг mайлбарлалаа. 

Холистик хандлага гэж юу вэ? Холистик эрүүл мэндийн зөвлөх яг юу хийдэг вэ?

Холистик хандлага нь аливааг нэг өнцгөөс бус цогц байдлаар харж түүнд агуулагдаж буй бүхнийг жижиглэн ангилж тус бүрээр нь авч үзэхийг хэлнэ. Харин холистик эрүүл мэндийн зөвлөх нь хүмүүст тэнцвэртэй амьдрах арга ухаанд суралцахад нь тусалдаг. 

Ингэхдээ тухайн хүний нийгмийн байдал, санхүү, гэр бүлийн харилцаа болон гэрийн орчин дахь уур амьсгал, хоололт, сэтгэл зүйн байдал, карьер болон ажлын нөхцөл байдал зэрэг мэдээлэл чухал. Яагаад үүнийг мэдэх шаардлагатай вэ гэхээр бид өдөр тутамдаа амьдралыг бүрдүүлэгч эдгээр хэсгээс сайн муу мэдээллийг байнга авч байдаг. Энэ нь цаашлаад бидэнд төрөл бүрийн мэдрэмжийг төрүүлдэг. Аль нэг хэсэгт сэтгэл дундуур, урам зориггүй, эрч хүчгүй мэдрэмж байнга төрдөг бол энэ нь тухайн хүний сэтгэл зүй, бие организмд сөргөөр нөлөөлдөг. Тэгэхээр дээрх хүчин зүйлсийн аль нь таныг тавгүйцүүлж, бие организмд тань яаж нөлөөлөөд байгааг л таньж мэдэх нь чухал.

Холистик эрүүл мэндийн зөвлөх бол хоол зүйч, клиник шим тэжээл судлаач, эмч эсвэл сэтгэл зүйч биш. Харин тэнцвэртэй амьдрах арга зүй, эрүүл зохистой хооллох зэрэг зөв дадал зуршлыг төлөвшүүлэхэд нь зөвлөдөг хүмүүс юм.

Эрүүл оршихуйг цогцоор нь авч үзэх нь яагаад чухал вэ?

Бид ихэвчлэн эрүүл мэндийг зөвхөн нэг талаас нь харах гээд байдаг. Ямар нэг өвчин тусах, хэвийн бус жинтэй байх, сэтгэлийн тавгүй байдал, донтолт гээд аль нь бай суурь шалтгааныг нь таньж мэдэхийн оронд ямар нэг бүтээгдэхүүн эсвэл эмэнд найддаг. Зөвхөн шинж тэмдгийг нь дарж аль болох өвдөлт зовиургүй, өөрт тээргүй байдлаар шийдэх гэж яарна. Гэтэл эдгээр асуудлын цаана яг ямар процесс явагдаад байгааг төдийлөн ухаж ойлгодоггүй. Бид юун түрүүнд амьдралын хэв маягаа өөрчилж өвдсөн хойноо бус өвчнөөс урьдчилан сэргийлэх нь хамгийн чухал гэдгийг маш сайн ойлгох хэрэгтэй . 

“Эрүүл орших нь угтаа тийм ч хэцүү зүйл биш боловч бид л үүнийг төвөгтэй болгоод байдагт асуудал байгаа юм.”

Эрүүл хооллолт, хоолны дэглэм баримтлахдаа хүмүүсийн гаргадаг хамгийн түгээмэл алдаа юу вэ?

Ер нь анзаараад байхад эрүүл хооллолтыг мөнгөтэй эсвэл завтай хүмүүсийн хийдэг зүйл гэж ойлгох нь элбэг байдаг. Гэтэл яг үнэндээ бид өдөр тутамдаа идэж байгаа хүнсэндээ багахан өөрчлөлт оруулахын зэрэгцээ хөдөлгөөнөө нэмж, бодол санаагаа цэгцтэй байлгаж сурахад л болох зүйл. Уг нь маш энгийн мэт санагдах ч өөрчлөхөд их хэцүү зүйл. Хамгийн гол нь хүн өөртөө өөрчлөлт хийх гэж байгаа бол “яагаад?” мөн “үр дүн нь юу вэ?” гэдэг асуултад хариулж, түүнийгээ ухамсарласан байх нь чухал. 

Гэтэл ихэнх нь эрүүл хооллолт, хоолны дэглэмд нийгмийн хэм хэмжээ, хэн нэгэнд таалагдах гэж эсвэл бусдыг даган дуурайх маягаар түрхэн зуурын сэтгэл хөөрлөөр ханддаг учраас энэ нь урт хугацаандаа дадал болж үлддэггүй. 

Хүрээлэн буй микро орчноо эрүүл болгохын тулд юуг анхаарах вэ?

Орчноо микро түвшинд эрүүл тэнцвэртэй болгохын тулд хамгийн түрүүнд бодит зорилго тавих хэрэгтэй. Цаашлаад хэт том зорилгыг хэт богино хугацаанд тавихаас зайлсхийж, нэг цагт нэг л зүйл дээр төвлөрч сурах нь зүйтэй. Ингэснээрээ та сэтгэл зүй болон бие махбодио туйлдахаас сэргийлнэ. Ер нь хүн өөрийн болон байгалийн био хэмнэлд тааруулж ажиллаж сурах хэрэгтэй. Сүүлийн үед хүмүүс биеэ машин шиг л эдэлж элээж байгаа нь байгалийн хуулийг зөрчиж буй хэрэг. Хэрэв та өндөр ачаалалтай ажилдаг бол өөртөө таатай, тааламжтай мэдрэмж төрүүлдэг зүйлсийг заавал хийж сурах хэрэгтэй. Өөрийн хэм хэмнэлээ л таньж мэдэхийг хичээх нь хамгийн зөв.

Яагаад Авант гэж? 

Сүүлийн үед хэрхэн байгальдаа ээлтэй байж, хог бага тарьж, органик бүтээгдэхүүнийг түлхүү хэрэглэж дадах вэ гэж их бодох болсон. Харин Авантын хувьд энэ үзэлтэй минь нийцдэг бөгөөд ноолууран хувцасны нэг хэвийн уйтгартай байдлыг илүү модерн байдлаар илэрхийлэхийн зэрэгцээ өнгөний хувьд илүү залуулаг байдал нь таалагдсан.


Best selling Products